Aao Bachcho Tumen Dikhayen Jhanki Hindustan Ki

Aao bachcho tumhen dikhayen jhaanki Hindustan ki
Is mitti se tilak karo ye dharati hai balidan ki
Vande Maataram ...4

Uttar mei rakhwali karta Parvatraj virat hai
Dakshin mein charno ko dhota Sagar ka Samrat hai
Jamuna ji ke tat ko dekho Ganga ka ye Ghaat hai
Baat-baat pe Haat-haat mein yahan Nirala Thaat hai
Dekho ye Tasviren apaney Gaurav ki Abhiman ki
Is mitti se tilak karo ye dharati hai balidaan ki
Vande Maataram ...4

Ye hai apna Rajputana, Naz ise talawaron pe
Isne sara jeevan kata Barachhi Teer Kataron pe
Ye Prataap ka vatan, Pala hai Aazaadi ke naaron pe
Kood padi thi yahaan hazaaron Padminiyaan angaaron pe
Bol rahi hai kan kan se kurabaani Rajasthaan ki
Is mitti se tilak karo ye dharati hai balidaan ki
Vande Maataram ...4

Dekho mulk Maraathon ka ye yahaan Shivaaji dola tha
Mugalon ki taakat ko jisane talavaron pe tola tha
Har Parvat pe aag lagi thi har Patthar ek shola tha
Boli Har-Har Mahaadev ki bachcha-bachcha bola tha
Yahaan Shivaaji ne rakhi thi laaj hamaari shaan ki
Is mitti se tilak karo ye dharati hai balidaan ki
Vande Maataram ...4

Jaliyaan vala bag ye dekho yahan chali thi goliyan
Ye mat puchho kisne kheli yahan khoon ki holiyan
Ek taraf banduken dan dan ek taraf thi toliyan
Marnevale bol rahe the Inqalaab ki boliyan
Yahan laga di bahano ne bhi baaji apani jaan ki
Is mitti se tilak karo ye dharati hai balidaan ki
Vande Maataram ...4

Ye dekho Bangal yahaa ka hur chappa hariyala hai
Yahan ka bacha-bacha apne Desh pe marnewala hai
Dhala hai isko Bijali ne Bhuchalon ne Pala hai
Muthi mein Tufaan bandhaa hai aur Praan mei Jwala hai
Janmbhumi hai yahi hamari Veer Subhash mahaan ki
Is mitti se tilak karo ye dharati hai balidaan ki
Vande Maataram ... 4                                                             -- Kavi Pradeep